কোনো কথা নাই

কোনো কথা নাই

কোকিল শইকীয়া

Sunset in Daksapori
Photography : Amar Borah

নিতান্তই প্ৰয়োজনীয় বা অপ্ৰয়োজনীয় বুলি
কোনো কথা নাই

এন্ধাৰ হোৱাৰ আগতে পোহৰ পাবগৈ লাগিব
সেই বুলিও কোনো কথা নাই

মই তোমাক ভাল পালোঁ
তুমিও মোক ভাল পাব লাগিব বুলি
কোনো কথা নাই

আজি সন্ধিয়াতেই ডাকচাপৰিলৈ যাম
টেটুলৈকে খাম আপং আৰু গাহৰি
দেৰিকৈ হ’লেও ৰাতিয়েই ঘুৰিব লাগিব
বুলিওটো কোনো কথা নাই

কেৱল নিৰ্ঘাত দুখ আৰু নিৰাসক্ত সত্যৰ বাহিৰে
কোনো ধৰা-বন্ধা কথা নাই

বাকী
যিবোৰ কথা আছিল
সেইবোৰ ইতিমধ্যে কথা হৈ থকা নাই